Амгалангийн уг

Эрхэм хүндэт бурхны шашинтан танаа энэ өдрийн мэнд дэвшүүлье. Түмэн олныг гийгүүлэгч Банчин Ой бүрүл Ринбүүчийн “Гүнчав Жамбаалин төв”, “Асрал төв” төрийн бус байгууллага нь үүсгэн байгуулагдсан үеэсээ Дээрхийн гэгээнтэн ХIV Далай багшийн зөвшөөрлөөр сургаал номлолыг нь эмхэтгэн товхимол болгож нийт уншигчиддаа хүртээсээр ирсэн билээ. Энэ удаа сүсэгтэн танд өдөр тутмын амны уншлага, сэтгэлийн ариусал болсон “Амгалангийн уг” хэмээх номыг өглөг болгон өргөж байна.
Аливаа хилэнцийг үл үйлдэн
Алин буяныг хотолчуулан үйлдээд
Анхаарч өөрийн сэтгэлийг сахих нь
Аяа тэр л бурхны шашин болой хэмээн Бурхан Шагжамүни айлдсан билээ.
Иймд бид зовлонгийн шалтгаан болж буй урд хураасан хилэнцийг наманчилан буруу үйлдлийг цээрлэж, жаргал амгалангийн шалтгаан болсон буяныг аль чадахаараа хураах нь чухал юм. Хилэнцийг тэвчиж, буяныг хураах чухал гол шалтгаан нь өөрийн сөрөг сэтгэлтэй тэмцэж, эерэг сэтгэлээ улам дадуулах юм. Ийм учир хилэнцийг наманчилж, буяныг хураан, сэтгэлээ хөгжүүлэхэд тань тус болъё гэсэн сэтгэлийн үүднээс энэхүү номыг толилуулж байна. 
Та бүхэнд аз жаргал сайн сайхныг хүсэхийн ялдамд энэхүү дээдийн номыг хүндэтгэн уншсанд баярлалаа.
Бурхны шашны Гүнчавжамбаалин төв,
Асрал төв төрийн бус байгууллага