“Зурхай” хэмээн нэрлэсэн энэхүү номоороо дамжуулан зурхайн, ялангуяа Нарны ордод тулгуурлан тайлдаг барууны зурхайн үндсэн ойлголтыг хэрхэн зөв таньж, уншиж, тайлах талаар энгийн бөгөөд ойлгомжтой байдлаар хүргэхийг зорилоо. Хүний төрсөн агшинд тэнгэрт орших Нар, Сар, гариг эрхэс, оддын байрлал өөр хоорондоо давтагдашгүй зохицлоор зурагддаг. Энэхүү тэнгэрийн зураглалыг зөвөөр уншиж чадвал хүн өөрийнхөө мөн чанар, авьяас билэг, давуу болон сул тал, алдаа оноо, боломж, хөгжүүлэх шаардлагатай чанаруудаа илүү ухамсартайгаар танин мэдэх боломжтой. Энэхүү бүтээл нь цуврал номын анхны дэд дэвтэр бөгөөд зурхай сонирхогч хүн бүхэнд хүртээмжтэй, ойлгомжтой байлгах үүднээс барууны зурхайн суурь ойлголтуудаас эхлэн тайлбарласан болно. Цаашдын цувралуудад төрөх зурхайн зурлага хэрхэн үүсдэг, түүнийг хэрхэн зөв уншиж, тайлах, гариг эрхэс болон ордуудын байрлалыг хэрхэн холбон ойлгох талаар бодит жишээн дээр тулгуурлан дэс дараалалтайгаар хүргэхээр төлөвлөж байна. Энэхүү цувралын үндсэн санаа бол нэгэн энгийн урилга юм. “Та өөрийнхөө амьдралын Зурхайч болоорой.” Өөрийн төрсөн агшинд тэнгэрт зурагдсан давтагдашгүй зургийг таньж мэдэн, тэндээс өөрийнхөө тухай шинэ ойлголтыг нээж, амьдралдаа ухаалгаар ашиглаж сурах аялалд таныг урьж байна.