Хөгжил гэх энэ ойлголт ихээхэн ярвигтай зүйл атал өнөө хэн хүний амны уншлага болсон нь эргээд хэн ч, юу ч гэж тайлбарлаж, ярьж болдог бие дүрсгүй, тодорхой чиггүй зүйл болж хувирчээ. Ингээд хэн ч ярьдаг, чаддаг сэдэв болчихлоор юу ч биш болдог зүй тогтол бий. Уг ойлголт анхлан Барууны философи сэтгэлгээ, тэр дундаа 19-р зууны Нийгмийн хувьслын онол, түүнээс өмнөх колоничлолтой салшгүй холбоотой бүрэлдсэн бөгөөд өнөөдөр тэр үеийнхээсээ танигдахгүй болтлоо, тэр дундаа бүр сөрөг утга нь улам бэхэжсэн шинжтэй болжээ. Энгийн үгээр бол хүн төрөлхтөн хөгжлийн дээд доод шатанд оршдог, видео тоглоомын үе давж байгаа юм шиг энэ шатлалыг давсаар нэг мэдэхэд дээд үеийн, загвар улсын түвшинд хүрнэ гэсэн сэтгэлгээг хөгжил гэж ойлгож байв. Тиймээс тэр үед хөгжлийн дээд шатанд байгаа улс нь доод шатанд байгаагаа дээрэмдэх, колоничлох, боолчлох нь “байгалийн шалгарал”, бурхны зохиол байлаа.