Монгол улсын Шинжлэх ухааны Академи нь анх 1921 онд “Судар бичгийн хүрээлэн” байгуулагдсанаар Монгол улсад шинэ үеийн шинжлэх ухааны төв байгуулага бий болсон түүхтэй бөгөөд хожим нь Шинжлэх ухааны хүрээлэн, Шинжлэх ухаан, дээд боловсролын хүрээлэн болон өргөжин тэлсээр 1961 онд Шинжлэх ухааны Академи болж үйл ажиллагаагаа явуулж байна.
Өнөөдөр Шинжлэх ухааны Академи нь харьяандаа нийгмийн ухааны 5 хүрээлэн, байгаалийн ухааны 9 хүрээлэнд нийт 1000 орчим эрдэмтэн судлаачтай шинжлэх ухаан, тэргүүний технологийг хөгжүүлэх зорилго бүхий шинжлэх ухааны төв байгуулага билээ.